Helge Torvund: Å pusta ut eit lerketre

Med hjartet på venstre side og blikket festa ved vatnet si hinne av sølv 

går eg gjennom skogen på ettergjevande botn av nåler og fint stabla tid
Mi sjel er eit ekorn som hoppar frå grein til grein over meg
Brunrød og buskete er gleda i klørne som grip tak i verdas bork

At stega i verda er steg for steg nå og pusten går kjølig og fri
Å vera sambu på jorda med froskar og falkar og bakke og bekk
Trekka pusten og fylla sanden med luft og havet med kvitkrusa bølgjer
Å pusta ut eit lerketre, ein strandnellik, eit sniglehus, min fot

Å gå gjennom det som går gjennom deg
og vera i verda som pust

Helge Torvund